إراء المشتركات

بحب اخبرك انه خطبتي كانت مبارح, مقدرتش ما اخبرك. بعد بفترة واغلب الوقت بحس بالتغيير الي مرقته معك. وين كانت هاي السيرورة وانا بال 25؟ كنت زي الغريب اللي بده يتعلق بقشة, الي بقبل بأي علاقة عابرة واشباه علاقات متتالية. خلال السيرورة معك فهمت انه الحواجز الداخلية اللي موجودة جواتي بتأثر بشكل كبير على تحدياتي في العلاقات, صرت واعية اكثر للاجزاء اللي جواتي اللي ما بدها علاقة .. فهمت انه مش عن عبث مش زابطة معي العلاقات, بالرغم من وجود اسباب الي بتتعلق بالطرف الاخر ولكن اغلب الشغل معي انا وهو داخلي وشغل على حالي.

قبل السيرورة معك كنت احكي انا ناجحة مش محتاجة اكون بعلاقة, واللي بعلاقة بكونوا اتخلوا عن استقلاليتهن. اي علاقة ادخلها اتركها بعد فترة قصيرة, بعد اسبوع او اسبوعين, بسبب اي خلاف بسيط, او اختلاف بالاراء, لان افكر انه توكسيك, او اي سبب كان, ومتجنبة جداً. اليوم كثير تغيرت. والشريك طلعلي خلال السيرورة معك, بعد ما كنت احكي فش شب عربي منيح.

فهمت اولا اني اكون بعلاقة هو مش اشي سهل زي كيف كنت بفكر،مش اشي اللي المفروض يصير هيك من الهوا وانه اشي طبيعي وتمام اشتغل عشغلات معينة عشان اساعد حالي بهاد المحل.

اهم اشي فهمته عن حالي انه تحدياتي سببها مش انه فيي انا اشي غلط،وانه احنا منجيب لحياتنا/منحذب ممثلين واشخاص يساعدونا بالسيناريو اللي هو اساساً براسنا.

شكرا الك عكل تغيير إيجابي فيي كان بفضل الوعي الي صحي فيي من ورا حبيبي وينك, ورشة الحدود والاستشارات. التسجيل معك كان احسن قرار عملته بحياتي, وكل يوم بمرق بتأكد من هالاشي بزيادة. فش أسبوع بمرق الا ما برجع عالمادة الي تعلمتها معك وكل مرة بشوفها غير وبشوف أشياء جديدة.

الي صار بأول اربع جلسات مصرش باشهر بعلاجي النفسي. اهم شغلة فهمتها بالجلسات هي انه مش انه فش شخص ملائم برا, ومش انه الحياة عم بتصرلي – انا الي كنت هالقد خايفة من الرفض لدرجة انه خلقت حياة فيها بتعرفش على حدا وانا مش منتبهة! بعد الجلسات معك عم اطلع بشعور empowerment. فيي حياة اكثر, في سعادة اكبر, وفي شعور اخف, حتى لغة جسدي تغيرت.. فخورة بحالي انه ما تخليت عن حالي وعن تواجد علاقات بحياتي واني سجلت لهاي السيرورة.

كنت ٤ سنين بعلاج سايكولوجي كليني، ووصلت مرحلة بعد ٤ سنين العلاج بطل اله فائدة. بشي مرحلة فهمت انه الحياة تبعتي مش هي الحياة اللي بدي هي، مع انه ساكنة لحالي وعندي منصب ناجح بنظر المجتمع، بس أنا شخصياً حاسة حالي ميتة. ساعتاها قررت أبدا معك تدريب شخصي، وواو واو النتائج, اليوم بعد نص سنة، اكثر انسان مبسوط، ممتن لحياته، ممتن لكل اشي مرقه، عمبحقق حلمي (افتح بزنيس واكون مستقلة), وصلت لمرحلة اني أنا اسا عايشة، ممتنة اني عرفتك، ممتنة انك رافقتيني، عمبعمل أشياء بحبها. الحمدلله انه ربنا حط بنيأدمة مثلك، واقعية، شفافة، طيبة، متصالحة مع نفسها، و professional مثلك بحياتي ♥️

في اشياء عنجد مكنتش فاهمتها حتى بالعلاج بس بالدورة كثير توضحت وزي حطيتي نقط عالحروف, المواد اللي مرقتيهن كانو بحر من المعلومات. كثير كان عندي لحظات باللقاءات اللي خلتني اتطلع عمواقف صارو من قبل وردات فعل بدرو مني وافكر ليش انا تصرفت بطرق معينة وشو كان ممكن اعمل احس وكيف ممكن كنت امرّق شعوري بشكل أفضل.


طلع ع السطح كثير سلوكيات ماكنت بتوقع انها موجودة! صرت افهم اكثر ليش بقرب وليش ببعد وحتى شو بحسّ. كثير معتقدات ومعلومات كنت مفكرتها صح، وبنيتها ع اساس انه هي الصخرة الحامية لألي، بس طلع بالاخر انو هي مجرد افكار بحكيها لنفسّي حتى ما أواجه مشاعري الحقيقه

حاسة تواصل اكثر مع مشاعري, والمحل الي في تواصلت مع الألم والمشاعر الثقيلة خلتني اسا اقدر أكون بطاقة حب كثير حلوة.

الأدوات الي اخذناها بالسيرورة ضرورية لكل الناس. لما حكينا عن الأجزاء الي فينا, حسيت انه البازل تركب, زي شفت الصورة كاملة. فهمت منين تصرفاتي بتطلع, نوع الطفلة الي كنتها, وكيف الاشي اثر على نوع تعلقي كبالغة. بعد هاي الدورة فهمت شو يعني انه الواحد يكون بعلاقة, شو يعني تبلش علاقة وتكون فيها, وقديش الاشي شغل كبير.

كنت مع اصحابي وكانوا يحكوا عن العلاقات, وهيك حسيت ولاو ليش هني بعرفوش شو انا اسا بعرف؟ لي مش الكل بعرف الأشياء الي تعلمناها معك؟ خلال الأسابيع كان تأثير كل لقاء يكون جدا محسوس باسبوعي, مرات كنت اتوتر من كيف حياتي بلشت تتغيّر كل ما بنينا أشياء لقاء ورا لقاء. حسيت نشوة بس شفت التغييرات الي مرقتها من اول لقاء لليوم, عم اعمل خطوة نحو العلاقات باكثر من طريقة واكثر من مجال.

لما كنت اشوف بانستغرام ايناس تكتب انه في شباب عرب ملائمين كنت احس انه طيب هي بتبالغ ومش عنجد, هي لاقت واحد ووحيد وخلص, بس بعد اللقاء عن المخاوف والتحديات بالعلاقات وبعد ما فهمتها وفككتها, عطول بعد بيومين طلع شب بحياتي out of nowhere. بقدر اقول انه في صفات فيه مكنتش اتخيل انها موجودة عند شباب عرب, وانه طلع معك حق ايناس. نفسي الكل يقدر يتعلم هاي الادوات الي محدا بعلمنا إياها!


تعلمت أتطلع على ما وراء افكاري ومعتقداتي. شعور العار وقيمتي الذاتية بطل متعلق بوضعي بالعلاقات! وصار تغييرات مهنية, صلي سنتين بدوّر على هويتي مهنيا وخلال الفترة بالدورة غيرت وظيفة.
مثير شو بصير خلال الدورة, بس تسجلي بتفكري انك رح تطلعي بعريس – بس بعدها بتطلعي بتغييرات واشياء ثانية, حتى علاقتي مع اهلي تحسنت وصرت اشوفهم بتعاطف, وصرت مفتوحة اكثر للعالم.

قبل ما بلشنا جلسات, كنت معلقة بشبه علاقة مع شخص الي مرة بده ومرة بدوش ومش عارفة اطلع منها. كنت حاسة اني بسجن, بس كنت راضية لانه حسيت اني بستاهل القليل. خلال الجلسات وصلت محل مش خايفة فيه أكون لحالي, وهلا, بعد ما وصلت هاد المحل بيني وبين حالي - لقيت شريك حياتي وخطبنا, عرسنا اخر هاي السنة. كنت خايفة ارتبط بحدا بس من ضغط المجتمع, واتنازل عن شغلات مهمة الي, واتزوج زواج تقليدي, وكنت اتسائل دايما هل هاد الانسان المناسب موجود؟ بحس مرات اني مش مصدقة اني وصلت المحل الي وصلته. حاسة بأمان واني بحلم. لو التقيت بشريكي قبل ما مرقت هاي السيرورة, مكناش بنكون جاهزين لبعض. هاي السيرورة هي من احلى الشغلات الي عملتها وازا بدي اشكر السوشال مبديا عاشي فهو اني لاقيت هاد المحل.

فتت على علاقة واول مرة بكنش كثير ضجة براسي, اول مرة بستقبل حب, اول مرة بتعلم اخذ مساعدة, اول مرة بكون بعلاقة امنة. بعد الدورة باكم شهر تجوزنا. مقهورة اني ما اخذتش هاي الدورة من زمان... كان وفرنا على حالنا سنين الم وسنين علاقات غلط. ولاو قديش كنا بنكون بمحل ثاني اسا بحياتنا لو عرفنا هاي المعلومات من قبل.
قد ما عم احكي عن الدورة بشغف – كل الي حوالي عم بسألوني وينتا في كمان دورة؟ هالقد يعني عم احكي للي حوالي عن شو مرقت معك بهاي الدورة.